Алматының су жаңа әкімі мәлімдеме жасады

Алматының жаңа әкімі Ерболат Досаев бұл тағайындау ол үшін ерекше құрмет және жауапкершілік екенін атап өтті.

«Бұл мен үшін құрмет және ерекше жауапкершілік. Біз сіздермен бірге қаңтардағы қайғылы оқиғалардан аман өтіп, қаламызды одан әрі көркейтуге және оған қуат пен өмірді қайтаруға бар күш-жігерімізді саламыз деп сенемін» деді Алматы қаласының әкімі Ерболат Досаев.

Жаңа әкімді қала активіне президент әкімшілігінің басшысы Ерлан Қошанов таныстырды, деп хабарлады Алматы телеарнасы.

Оның айтуынша, басты назар қаланы қалпына келтіруге, шағын және орта бизнесті дамытуға және халықтың кірісін арттыруға аударылуы керек.

«Біздің алдымызда тұрған жаңа міндеттер әкімдік қызметіне жаңа көзқарастарды, тың серпін беруді талап етеді. Сондықтан, Ерболат Асқарбекұлы, президент сізге ірі мегаполисті басқаруды сеніп тапсырды» деді президент әкімшілігінің басшысы Ерлан Қошанов.

Ерболат Досаев Ұлттық банкті 2019 жылдан бері басқарып келеді. Бұған дейін ол Қаржы, денсаулық сақтау, экономикалық даму және сауда, экономика және бюджеттік жоспарлау, сондай-ақ ұлттық экономика министрліктерін басқарып, вице-премьер қызметін атқарған. 51 жастағы Ерболат Досаев Алматы қаласының тумасы.

2019 жылдың маусым айынан бері қала әкімдігін басқарған Алматы қаласының бұрынғы әкімі Бақытжан Сағынтаев ұжымның бірлескен жұмысы үшін алғыс айтып, ортақ табысқа тоқталып, мұрагеріне сәттілік тіледі.