Алматының «сары» аймаққа көшуіне байланысты жеңілдетулер болады

Алматының «сары» аймаққа көшуіне байланысты карантиндік шектеулер жеңілдетіледі. Бұл туралы қаланың бас санитарлық дәрігері Жандарбек Бекшин мәлімдеді. Оның айтуынша, бұған дейінгі  қатаң шектеулер «қызыл» аймақта болған кезде қойылған.

«Алматы 30 қаңтарда қала «сары» аймаққа ауысты.  Осыған байланысты ендігі жерде жеңілдетулер болады. Бұл барлық тармақтарға, соның ішінде коронавируспен ауыратын науқастарды ауруханаға жатқызуға да қатысты. Симптомсыз науқастар оқшаулау жағдайлары болған кезде үйде қалады. Ауырлығы орташа науқастар қолданыстағы қаулыға сәйкес  ауруханаға жатқызылады», - деді Бекшин.

Бас санитарлық дәрігер Алматының «сары» аймаққа көшуіне байланысты қолданылатын жаңа шектеулер күшіне енетінін айтты. Ол үшін қалалық нысандар қызметін реттейтін жаңа қаулы қабылданады. Құжат жақын арада жарияланады.

Бұған дейін Жандарбек Бекшин симптомсыз коронавируспен ауыратын науқастардың барлығын ауруханаға жатқызу қауіпті деп, оның шешіміне қарсы шыққан  дәрігерлердің сынына жауап берді. Олар COVID науқастары жағдайының ауырлығына қарамастан, барлығын бірдей ауруханаға жатқызу туралы тармақпен келіспейтіндіктерін айтқан болатын.

Естеріңзге сала кетсек, 28 қаңтарда Алматының бас санитарлық дәрігері Жандарбек Бекшин 1 ақпаннан бастап қалада кез-келген түрде коронавируспен ауырғандарды ауруханаға жатқызу туралы шешім қабылдаған болатын.

Бұған дейін қаланың «қызыл» аймақта болуына байланысты карантиндік шаралар күшейтіліп, біраз нысандар  қызметіне шектеулер енгізіліп, демалыс күндері сауда орталықтары жұмыс істемейтіні айтылған.