Алматының екі миллионыншы тұрғыны баспаналы болды

Қала күні мерекесі аясында Алматының көпбалалы отбасына үш бөлмелі пәтер кілті табысталды.

Алматы қаласының екі миллионыншы тұрғыны Аяла Жамбылдың отбасы бүгін жаңа қонысқа ие болды.  Қала күні мерекесінде оларға Алматы әкімі Бақытжан Сағынтаев жаңа пәтердің кілтін табыстады.

Бұл туралы  Orda.kz   Almaty.tv. арнасына сілтеп хабарлады.

Ұлттық статистика бюросы 2021 жылдың 21 маусымында дүниеге келген Аяла Жамбыл қаланың екі миллионыншы тұрғыны атанғанын хабарлаған болатын.

Мереке күні қала әкімі Бақытжан Сағынтаев Аяланың ата-анасына Наурызбай ауданындағы «Алма Сити-5» тұрғын үй кешеніндегі үш бөлмелі жаңа пәтердің кілтін табыстады. Сағынтаев балалар мен ата-аналарға зор денсаулық, отбасына бақыт пен береке тіледі.

Екі миллионыншы алматылық Аяла Жамбыл полиция қызметкері Бейбіт Әбілдаев пен балабақша тәрбиешісі Әлия Жаныбекованың отбасында дүниеге келген алтыншы қыз. Бұған дейін көпбалалы отбасы Қарғалы шағынауданында ата-анасының үйінде тұрған.

Жергілікті атқарушы органдардың қолдауымен отбасының баспаналы болу арманы орындалды. Енді көпбалалы отбасы жаңа, әрі жайлы  үйде тұратын болады.

Алматы қаласында жыл басынан бері көмекке мұқтаж 2 340 отбасы жеңілдетілген несие аясында тұрғын үймен қамтамасыз етілді.