Алматылық суретші «Алаш» көсемдерінің үш портретін қатар салды

Алматылық суретші «Алаш» партиясының негізін салушылар Әлихан Бөкейханов, Ахмет Байтұрсынов және Міржақып Дулатовтың портретін үш қарындашпен бір мезгілде салды.

27 жастағы Әсел Сабыржанқызы төрт жасынан бастап сурет салумен айналысып, кәсіби суретші болу үшін ұзақ жолдан өткен екен. Бойжеткен Қазақ ұлттық өнер университетінің (ҚазҰӨУ) жанындағы өнер мектебінде, колледжде, кейін университеттің өзінде білім алып, биыл Т.Жүргенов атындағы Қазақ ұлттық өнер академиясының магистратурасын тәмамдаған.

Бойжеткен майлы бояумен негізінен гиперреалистік портреттерді салады, бір жұмыс 1-2 айлық тынымсыз еңбекті талап етеді. Бірақ Әсел сурет пен эскиздің идеясын немесе тұжырымдамасын бірнеше жыл бойы ой елегінен өткізе алады.

Саяси қайраткерлердің портреттерін бір мезетте үш қарындашпен салу процесі түсірілген бейнеролик Әселдің TikTok парақшасында миллиондаған қаралым жинады, сонымен қатар суретшінің бұл әрекетіне таң қалған әлеуметтік желі қолданушылары мыңдаған пікір қалдырды.