Алматылық дәрігерлер 530 грамдық баланы аман алып қалды

Алматыда Перинатология және балалар кардиохирургиясы орталығының дәрігерлері жансақтау бөлімінің қабырғасында шала туған сәбидің өмірі үшін 55 күн күресті. Қыз бала 26-шы аптада дүниеге келген, салмағы 530 грамм. Қазір нәресте анасымен бірге үйіне оралды.

Перинатология және балалар кардиохирургиясы орталығының баспасөз қызметі 55 күннің 26 күні сәбидің механикалық желдету аппаратында болғанын түсіндірді. Содан кейін ол жаңа туған нәрестелер патологиясы бөліміне ауыстырылған.

– Бүгінгі таңда 1 келі 925 грамм салмаққа жетіп, емделіп шыққан қыздың жағдайы тұрақты, - дейді орталықтың бас дәрігері Гүлнәр Нұрланова.

Өз кезегінде қыздың анасы баласын аман алып қалған дәрігерлерге алғысын білдірді.

Жыл басынан бері орталықта 613 шала туған нәресте дүние есігін ашқан.