Алматылық азаматтың қорасынан сегіз қару табылды

Полицейлер жасырын қоймадан 12 калибрлі «Сайга» қаруының  сегізін тапты.

Алматының Наурызбай ауданы тұрғынының қорасынан қару-жарақ, оптикалық көздегіш және аң аулау құралдары сақталған қойма табылды. Polisia.kz хабарлағандай, ер адам олжаны елдегі жағдай түзелгенге  дейін жасыра тұрғанын мойындаған.

— Арнайы іс-шара барысында 5 қаңтар күні  «Камерад» қару-жарақ дүкенін тонауға қатысқан 1984 жылы туылған азаматша К. ұсталды. Ол 5 қаңтарда  12 калибрлі тегіс ұңғылы сегіз қаруды алып кеткен.  Сотталушының «елдегі ахуал қалпына келгенге дейін» олжаны үйдегі адамдар  көзінен таса ұстап, қораға жасырғаны анықталды. Барлық қарулар тәркіленді. Оған қатысты сараптама тағайындалды, - деді Алматы полиция департаменті бастығының орынбасары Берік Әбілбеков.

«Камерад» қару-жарақ дүкенінен қару-жарақ пен өзге де мүлікті ұрлау фактісі бойынша қылмыстық істі Әуезов ауданы басқармасының ішкі істер бөлімі тергеп жатыр. Күдікті уақытша ұстау абақтысына қамалды.