Алматыға қаңтар оқиғасы мен Мамайдың ісін тергеуге Ұлыбританиядан комиссия келді

Бүгін, 16 қаңтар күні Алматыға Қаңтар оқиғасы мен тіркелмеген Демпартия жетекшісі Жанболат Мамайдың ісін тергеу бойынша Ұлыбритания парламенттік комиссиясы келді. Бұл туралы Жанболат Мамайдың жұбайы Инга Иманбай хабарлады.

– Бүгін Алматыға Қаңтар оқиғасын және Жанболат Мамайды қылмыстық қудалау ісін тергеу бойынша Ұлыбритания Лордтар палатасының мүшесі Кен Макдональд (Lord Macdonald KT KC of River Glaven) бастаған Комиссия өкілдері келді. Комиссия құрамында халықаралық құқықтық көмек көрсету компаниясы Bindmans LLP жетекшісі Тайаб Али мен басқа да арнайы мамандар келіп жетті. Бірнеше күннен кейін Алматыға Комиссияның тағы бір мүшесі - Ұлыбритания парламент депутаты сэр Роберт Бакленд те ат басын бұрмақ. Бірнеше күннің ішінде Комиссия мүшелері Қаңтар оқиғасына қатысушылармен, азаптау құрбандарымен, қасіретті күндері туған-туысынан айрылғандармен және бірқатар құқық қорғаушылармен, журналистермен де кездеспек. Сонымен бірге, Комиссия өкілдері қазіргі таңда үй қамақта отырған Жанболат Мамаймен де сөйлесуді жоспарлап отыр, – деп жазды Инга Иманбай facebook парақшасында.

Оның айтуынша, Мамай тарабы сотқа арнайы қағаз жолдаған. Сондай-ақ комиссия Астанаға барып, Қазақстанның лауазымды өкілдерімен кездесуді жоспарлап отыр. Осы аптада Комиссия өкілдері Алматыда арнайы баспасөз мәслихатын өткізеді.