Алматыдағы жер сілкінісі ешқандай зақым келтірген жоқ - ТЖМ

10 мамырда Алматыда болған жер сілкіністерінен кейін ҚР ТЖМ «Қазселденқорғау» ММ мамандары әлсіз жерлерге жедел мониторинг жүргізді, деп хабарлайды Orda.kz.

Ведомствода хабарлағандай, тексеріс өзен арналарын, гидротехникалық құрылыстарды, сондай-ақ көшкін қаупі бар және сел қаупі бар аймақтарды қамтыды. Сонымен қатар, мамандар тіршілікті қамтамасыз ететін нысандарды да шолып қарап шықты.

«Тексеру нәтижелері бойынша зақымдану табылған жоқ, қазіргі уақытта аталған нысандар штаттық режимде жұмыс істейді. Қираулар мен зардап шеккендер туралы мәлімет түскен жоқ. Жағдай тұрақты» деп жазылған «Қазселденқорғау» хабарламасында. 

Еске салсақ, сейсмикалық дүмпу Астана уақыты бойынша 20:35 болды. Эпицентр Алматының оңтүстік-батысына қарай 35 шақырым жерде, Қазақстан мен Қырғызстанның шекарасында орналасқан. 

Ұлттық сейсмологиялық бақылау орталығының мәліметінше, Алматы, Қаскелең және Қарғалы ауылындағы жер сілкінісінің күші екі бал болды.