Алматыдағы атышулы жол апатына айыпты үйқамаққа жіберілетін болды

Алматыда 26 маусымда болған жеңіл көлік пен автобус соқтығысқан жол апатында ереже бұзды деп ұсталған Әнел Сартаева тергеу кезінде үйқамаққа жіберілетін болды.

Бұл туралы Orda.kz тілшісі хабарлады.

Бүгін сотта аппеляциялық ұсыныс қаралып, тергеу кезінде Сартаева үйқамақта болып, баласына қамқорлық көрсете алатын болды. Бұл туралы адвокат Қанат Әлсейіт өзінің  instagram парақшасында жариялады.

Еске сала кетейік, 26 маусымда Алматы қаласында болған апат кезінде 1 адам қаза тауып, 16 адам медициналық көмекке жүгінуге мәжбүр болды. Абайсызда апатқа себепкер болған Әнел Сартаева оқиға орнынан кетпей, полиция қызметкерлеріне материал жинауға көмектесті. Оны уақытша қамау изоляторына қамады. Сартаева өкініп, кінәсін түгел мойындады. Артынша Сартаеваның жас ана екені анықталды. 4 айлық нәрестенің сүтке аллергиясы болған соң, туыстары оны уақытша қамау изоляторына әкеліп жүрді. 

«Бас бостандығынан айыру орындарында ана мен балаға қаншалықты жағдай жасалған және бұл шешім қаншалықты әділ?» деген сұраққа жауап іздеп, мақала жазған болатынбыз.  Мақалада белгілі психосарапшы Анна Құдиярова нәресте психикасына бұл жағдай қаншалықты әсер ететінін және автобус жүргізушілерінің психологиясы мен жол апатының себептерін саралап, бейсанадағы өлімге құштарлық туралы әңгімелеп берді.

Еске сала кетейік, Әнел Сартаеваға апат кезінде қайтыс болған жігіттің жақындары  жеңіл жаза беруді сұраған болатын.