Алматыдағы арнайы ХҚКО басшысының орынбасары жазадан құтылды

Алматыда арнайы ХҚКО бөлімінің басшысының орынбасары заңсыз жолмен 930 мың теңге иемденді деген айыпқа ілінген. Дегенмен сотта ол кінәсін толық мойындап, жәбірленушімен татуласып, келтірілген залалды өтегені үшін жауапкершіліктен босатылды, деп хабарлайды Orda.kz.

Сотқа дейінгі тергеу қызметі басшысының орынбасары Тимур Қырықбаев Kazinform-ның ресми сауалына мынадай жауап берді.

«Сот қаулысымен ол кінәсін толық мойындауына, жәбірленушімен татуласуына және келтірілген залалды өтеуіне байланысты, қылмыстық жауапкершіліктен ақтамайтын негіздер бойынша босатылды», деп жазылған қаулыда.

Антикордың мәліметінше, лауазымды тұлға жергілікті кәсіпкерден авто­мектеп курсанттарын жүргізуші куәлігін алу үшін емтихан тапсыруға жіберу және құжаттарын кедергісіз қабылдауға жәрдемдесу сылтауымен 930 мың теңге көлеміндегі ақшаны заңсыз иемденді деген күдікке ілінген.

Сотқа дейінгі тергеу қызметі басшысының орынбасары Тимур Қырықбаевтың редакция сауалына берген жауабына сәйкес, «Азаматтарға арналған үкімет» мемлекеттік корпорациясы» КЕАҚ Алматы қаласы бойынша мамандандырылған № 1 бөлім басшысының орынбасары С.-ға қатысты сотқа дейінгі тергеу материалдары сотқа жолданған.