Алматыдағы Тәуелсіздік монументінде Желтоқсан батырларын еске алу рәсімі өтті

Алматыдағы Тәуелсіздік монументінде Желтоқсан қаһармандарын еске алу рәсімі өтті, бұл туралы Алматы әкімінің баспасөз қызметі хабарлады.

«Алматы қаласының әкімі Ерболат Досаев Тәуелсіздіктің 31 жылдығына арналған рәсімге қатысып,  «Тәуелсіздік» монументіне салтанатты түрде гүл шоқтарын қойды. Салтанатты шараға қала тұрғындары, ардагерлер, қоғамдық ұйымдардың, этномәдени бірлестіктердің өкілдері, 1986 жылғы Желтоқсан оқиғасының ардагерлері  қатысты. Шараға қатысушылар мемлекет тәуелсіздігі жолында құрбан болғандарды бір минут үнсіздікпен еске алды» деп хабарлады  Алматы әкімінің баспасөз қызметі.

Салтанатты шара Алматы облыстық гарнизонының әскери үрмелі оркестрінің сүйемелеуімен Қазақстан Республикасының Әнұранын орындауымен аяқталды.

Еске салайық, 1986 жылы 16 желтоқсанда еліміздің жастары Алматыдағы орталық алаңға шығып, кеңестік әкімшілік-әміршілдік жүйенің әдістеріне қарсы бүкілхалықтық наразылық білдірді. КСРО Ішкі істер министрлігі арнайы жасақтарының жазалау шаралары нәтижесінде 200-ге жуық демонстрант қаза тауып, 200-ден астамы жараланды, 1 мыңнан астам адам қуғын-сүргінге ұшырап, тұтқындалды.