Алматыдағы барахолкада  2000 шаршы метр қойма өртеніп кетті

Өрт сөндіруді қоймадағы тауарлардың көптігі және өрт сөндіру құрылғысына келетін қысымның әлсіздігі қиындатқан.

Алматыдағы барахолка қоймасындағы өрт бүгін, 15 қаңтарда таңғы сағат 10-дар шамасында басталған. Өрт сөндірушілер келгенше қойма толығымен өртеніп, төбесі опырылып жатқан.

«Өрт  2000 ш.м. қоймадағы тауарлар мен материалдардың жанғыш жүктемесінің жоғары болуына байланысты (пластикалық құбырлар, санитарлық-техникалық бұйымдар және т.б.) үдей түскен. Жеке құрам арасында шығынды болдырмау мақсатында өрт сөндірушілер қауіпсіздік ережелерін сақтай отырып жұмыс істеді. Оқиға орнына жедел штаб жұмылдырылды, көрші қоймаларды сөндіру және қорғау үшін арнайы  жабдықтар  енгізілді. Қоймалардан тауарлар мен материалдарды шығару ұйымдастырылды»  деп хабарлады ҚР Төтенше жағдайлар министрлігі.

Анықталғандай, қоймада өрт сөндіру кранының ақауы бар болып шықты. Соған қарамастан, өрт 12-42-де оқшауланып, 13-18-де жойылды. Құрбандар мен зардап шеккендер жоқ. Өрттің шығу себебі анықталуда.