Алматыдағы «Адем» сауда орталығын белгісіз біреу «миналаған»

«Адем» сауда орталығы сатушылары мен келушілерінің жаңа жылдағы алғашқы жұмыс күні эвакуациядан басталды.

Алматы қалалық ІІД Жедел басқару орталығына таңғы сағат 9:59-да телефон лаңкесi хабарласқан. Төтенше жағдайлар қызметі дереу «Адем» сауда орталығына аттанды.

— Сауда үйінің келушілері мен қызметкерлерін эвакуациялау және ғимаратты тексеру шаралары жүргізілді. Комиссиялық тексеру нәтижесінде жарылғыш зат табылмады. Күдікті заттар да табылмады. Сағат 11:02-де қалалық төтенше жағдайлар қызметі тоқтатылды, - деді Алматы полиция департаментінің баспасөз хатшысы Салтанат Әзірбек.

Қазір телефон лаңкесін мегаполис полициясының жедел қызметтері іздеуде. Оның жеке басы анықталды.

Жарылыс  туралы жалған қоңырау үшін шалған тұлға қылмыстық жауапкершілікке тартылатынын ескертеміз.