Алматыда жас жігіт қызы тастап кеткені үшін оны соққыға жықты

Алматыда жас жігіт бұрынғы қызын соққының астына алды. Қыздың құрбысы полицейлер әрекетсіздік танытқаны туралы хабарлады.

4 ақпаннан 5 ақпанға қараған күні кешке бойжеткенді бұрынғы жігіті ұрып кеткен.

«Оның есімі Батырбек. Олар бір ай бұрын айырылысқан. Сол күні жігіт күні бойы қызды аңдыған. Сағат кешкі 9-ға қарай ол құрбысының үйіне тырнақ жасатуға келген. Ол жақтан түнгі сағат 2-де қайтқан, себебі шай ішуге қалып қалған. Жігіт күні бойы кіреберісте оны күтіп тұрған. Содан соң қыздан оған мүмкіндік беруін сұрап, сөйлесуге тырысқан. Артынан қалмай, қыздың чемодандарын үйіне дейін жеткізіп берген.

Үйге кіріп бара жатқанда қыз онымен ары қарай қарым-қатынасты жалғастырғысы келмейтінін айтқан. Осы кезде ол қыздың телефонын тартып алып, оған шабуыл жасаған. Содан соң жәбірленуші полиция мен жедел жәрдем шақырады. Ал полиция бұл тұрмыстық жайт деп, жігітке ештеңе болмайтынын айтқан» деп жазды «Не Молчи» қорының жетекшісі Дина Таңсәрі.

Желіде тараған видеодан ер адамның қызды ұрып, артынша басынан тепкенін көруге болады.

Белгілі болғандай, тергеуді Әуезов аудандық полиция басқармасы жүргізіп жатыр.

«Қыздың алған дене жарақаттарының ауырлық дәрежесін анықтау үшін сот-медициналық сараптама тағайындалды, нәтижелері бойынша болған оқиғаға баға беріліп, түпкілікті шешім қабылданады» деді Алматы қаласы полиция департаментінің баспасөз қызметі.