Алматыда жалған екпе төлқұжатын берген медициналық мекемелер анықталды

Алматы қаласының медициналық мекемелерінде вакцинаның жалған төлқұжаттарын беріп отырған медицина қызметкерлерінің  жолы кесілді.  

Полицейлер ZOOM-да өткен жиналыс барысында  вакцина төлқұжаттарына байланысты істі  үнемі бақылауда ұстап, анықтап отыратындықтарын  айтты.

Бұл туралы Orda.kz  порталы Polisia.kz.-ке сілтеме жасап хабарлайды.

Тергеу барысында № 21, № 4, № 16 және № 13 қалалық емханалардың жалпы дәрігерлеріне қатысты қылмыстық істер қаралуда.

— Іс жүзінде азаматтарға жалған  вакцина жасау көріністері анықталды. Дәрігерлер жалпы базаға бірінші компонент ретінде дозаны алу туралы жалған деректерді енгізді. Сондай-ақ олар  вакциналау  бөлмесінде бейнебақылау камерасы болған жағдайда,  екпені салғандай көрініс жасап,  ине салынған орынды пластырмен жапқан, - деді Алматы қаласы ПД басшысының бірінші орынбасары Нұрлан Алмасбеков.

Ол жалған құжаттарды жасағаны үшін төрт жылға дейін бас бостандығынан айыруға дейін, ал оны қолданғаны үшін 40 тәулікке дейін қамауға алу туралы бап бар екенін еске салды.

Сонымен қатар жоғарыда аталған азаматтардың іс-әрекеттерінде «қызметтік жалғандық» белгілері бар, бір сөзбен айтқанда,  ресми құжаттарға қасақана жалған ақпараттар енгізілген.