Алматыда «Жаңа Қазақстанды» қолдау акциясы өтті

Ғылым академиясының алдындағы аумаққа мыңға жуық адам жиналды.

Алматылықтар бүгін Ғылым академиясының алдына жиналды. Ресми ашылу басталмай жатып-ақ, Шоқан Уәлиханов ескерткіші алдындағы алаң келушілерге толды. Бастысы аталған аумаққа 1000-нан астам адам сияды.

Жиынға қатысушылар – ұстаздар, студенттер, медицина қызметкерлері «Біздің күшіміз бірлікте», «Біз радикализмге қарсымыз», «Президетпен бірге» плакаттарын алып шыққан.

 Кейбіреулер өздерімен бірге Аманат партиясының логотипі бейнеленген жалауларды ала келген.

Мәжіліс депутаттары Саясат Нұрбек пен Айдос Сарым жиынға қатысып, келушілерге  қолдау білдірді. 

Сахнадан «Суперпрезиденттік республикадан мықты  парламенті бар президенттік республикаға көшеміз!» деген ұрандар естілді. Бүгінгі Алматының  ауа-райы көңіл көншітерлік емес, жауын-шашын болуы да ықтимал.

Колледж оқытушысы Нұрсұлу Жаппарқалиқызы ел игілігі үшін «Аманат» партиясын қолдау қажет деп есептейді. Жиын туралы ол мұғалім болып жұмыс істейтін досынан естіген.  Көптеген студенттер біздің тілшілерге  акцияға  өз еріктерімен келгендерін, бұл туралы әлеуметтік желіден білгендерін айтты. Дегенмен студенттердің  көбі шаруалары барын айтып, тез тарай бастады.

Жиынға қатысушылар ыстық тамақ тарату пунктін ұйымдастырды. Тілек білдірушілерге ыстық шай мен бауырсақ ұсынылды. Алаңда  8 дәретхана орнатылған. Ал сахнада мезгіл-мезгіл музыкалық шығармалар ойнатылып жатты.

Тележүргізуші Сергей Пономарев сахнадан сөз сөйлеп, Украина мен Ресей арасындағы әскери қақтығыс тақырыбын қозғады.

— Екі бауырлас славян халқы соғысуда. Бұл оқиға менің жаныма батады. Жазықсыз адамдар қырылып жатыр. Қазақстан бұдан сабақ алуы керек. Біздің де  жанжалдасқанымызды қалайтын мықты, ықпалды көршілеріміз бар екенін ескеруіміз керек, – деді Сергей Пономарев сахнадан.