Алматыда «Жаңа Қазақстан. Күшіміз бірлікте» жастар фестивалі өтті

«Жаңа Қазақстан» жастар қозғалысы Тоқаевты қолдайды.

Қазақстан жастары  Мемлекет басшысының ел халқына Жолдауында жариялаған саяси реформалар бағдарламасын қолдайтындықтарын көрсетті.

«Алматы Аренада» өткен шараға жастар қозғалысының белсенділері – өнер қайраткерлері, спортшылар, қоғамдық ұйымдар өкілдері, жас кәсіпкерлер мен студенттер жиналды.

Фестиваль-концерттің бастамашылары мен демеушілері кәсіпкер, меценат Сырымбек Тау мен оның жолдастары екені хабарланды.

«Жаңа Қазақстан» жастар қозғалысына шығармашыл жас Оңдасын Құлымбет, G-38 студенттік қозғалысының негізін қалаушы Айсұлу Ерниязова, кәсіпқой боксшы Жанқош Тұраров және басқа да жастар өкілдері қолдау көрсетті.

Қазақстан Президенті Қасым-Жомарт Тоқаев «Жаңа Қазақстан: жаңару мен жаңғыру жолы» атты Жолдауында: «Біз адамдардың күш-қуатына, талантына және еңбекқорлығына сүйенеміз. Осы арқылы ғана біз халқымыздың жасампаздық әлеуетін арттыра аламыз» деп атап өткен болатын.

Еске салсақ, 16 наурызда қоғам мен бизнес өкілдері «Жаңа Қазақстан» қоғамдық жастар қозғалысын құру туралы хабарлаған болатын.

Қозғалыс бастамашыларының айтуынша, бұл ұйым Алматыда ғана емес, өзге өңірлерде де ЖОО студенттерімен жұмыс істейтін болады. Осыған орай «Жаңа Қазақстан. Күшіміз бірлікте» фестивалі ұйымдастырылды.