Алматыда жүргізуші ер адамды арыққа лақтырып жіберді

Оқиға Алматыдағы Сәтбаев пен Байтұрсынов көшелерінің қиылысында болған. Белгісіз ер адам жолдың қақ ортасында тұрып алып, жүргізушілердің өтуіне кедергі жасап, төтенше жағдай туғызған.

Қалалық полиция бөліміне 8 ақпан күні сағат 17:15-те мас жаяу жүргінші туралы хабарлама келіп түскен.

Оқиғаның видеосы әлеуметтік желіде тарап кетті.

28 жастағы алматылық азаматтың мас болғаны белгілі болды.

«Төтенше жағдай жасағаны үшін (ҚР ӘҚБтК-нің 615-бабы) және қоғамдық орында алкогольдік масаң күйде болғаны үшін (ҚР ӘҚБтК-нің 440-бабы) жауапқа тартылды. Ер адамды жол жиегіне лақтырып жіберген жүргізуші іздестіріліп жатыр. Оның әрекетіне құқықтық баға беріледі. Зардап шегуші медициналық көмекке жүгінбеген» деді Бостандық аудандық полиция бөлімінің бастығы Думан Аухадиев.