Алматыда «Үздік инновациялық стартаптар» байқауы өткізілді

Алматыда жас өнертапқыштардың «Үздік инновациялық стартаптар» байқауы өтті. Сайыс Jas Otan коворкинг орталығында Creative Jastar жобасы аясында жүргізілді.

Іс-шарада еліміздің Ұлттық кәсіпкерлер палатасы өкілдерімен кездесу аясында макеттер көрмесі ұйымдастырылды.

Шарада Nur Otan партиясының Алматы қалалық мәслихат депутаты Қайрат Құдайберген және Алматы қаласы Кәсіпкерлер палатасынан Темірлан Мадиев, сондай-ақ кәсіпкерлікті қаржылай емес қолдау бөлімінің басшысы Абзал Өмірбай конкурсқа қатысушы жастардың жобаларымен танысты.

Іріктеудің бірнеше кезеңінен өткен үздік 25 қатысушы қазылар алқасы, сарапшылар мен демеушілердің алдында 12 номинация бойынша өз жобаларын қорғады. Іс-шара барысында жастардың инновациялық әлеуетін дамытуға, сондай-ақ еліміздің креативті экономикасын дамытуға бағытталған 500 жобаның ішінен 25 үздік жоба топ жарды.

Сонымен қатар шара барысында стоматологиялық және медициналық тренажерлар өндірісі бойынша жобалар, қаладағы экологиялық жағдайға қарсы күрес бойынша жобалар, инновациялық ақылды үй жүйесі, бөлмедегі ауаны тазартуға арналған бризер өндірісі, алдағы іс-шаралар туралы ақпараттандыру үшін мобильді қосымша әзірлеу, ерекше адамдарға арналған орталық құру, елде туризмді дамыту бойынша жобалар таныстырылды.

Сондай-ақ көрмеге әлеуетті инвесторлар мен демеушілер де  өздерінің стартап жобаларын әкелді. Бұған дейін Алматы қаласы әкімдігінің жанындағы Қоғамдық даму басқармасының қолдауымен CREATIVЕ JASTAR жобасы қолға алынғандығы хабарланған болатын.