Алматыда заңсыз тұрғызылған 12 қабатты үй сот шешімімен сүріледі

Алматыда заңсыз тұрғызылған 12 қабатты үй сот шешімімен бұзылады, деп хабарлайды қала әкімінің баспасөз қызметі.

«Шұғыла» ықшамауданы, Байтелі батыр көшесі  бойында салынып жатқан көпқабатты тұрғын үй кешенінің төңірегіндегі сот процестері былтыр жаздан бері жалғасып келеді. Нәтижесінде сот Алматы қаласы әкімдігінің ғимаратты бұзу туралы талап арызын қанағаттандырды.

 «Алматы қалалық сотының 2022 жылғы 18 наурыздағы шешімімен Алматы қаласы әкімдігінің талап арызын қанағаттандырылып,  заңсыз салынған 12 қабатты тұрғын үйді бұзу туралы шешім қабылданды. «ART-TECHNOSS» ЖШС-мен сот процесі өткен жылдың маусым айынан бері жалғасуда»  делінген қала әкімдігінің хабарламасында.

Азаматтардың өтініші бойынша сот ісін жүргізуге дейін қала құрылысын бақылау бөлімімен тексеру жүргізіліп, сәулет, қала құрылысы және құрылыс қызметі саласында бірқатар заң бұзушылықтар анықталып, әкімшілік хаттамалар жасалды.

Іс сотқа жіберілді, алайда 2021 жылдың 9 желтоқсанында сот талап арызды қанағаттандырусыз қалдырды. Бірақ кейіннен шағым қайта қаралып, талап қанағаттандырылды.