Алматыда үшінші теміржол вокзалы салынады

Алатау ауданындағы «Алматы-3» станциясының құрылысы агломерацияны дамыту жөніндегі жобалар кешенінің бір бөлігіне айналады.

Бұл туралы әкімдік хабарлады.

Жоба Алматы қаласының 2040 жылға дейінгі бас жоспарына енгізілген.

«Жаңа теміржол платформасы жолаушылар мен жүк ағынын қайта бөлуге және қосымша пойыздарды қосуға мүмкіндік береді. Бұл қаланың жол инфрақұрылымындағы көлік жүктемесін азайтады» делінген қала әкімдігінің хабарламасында.

Жаңа теміржол платформасын салуға арналған алаң «Қазақстан темір жолы» Ұлттық компаниясы» АҚ-на тиесілі магистральдық желіде орналасқан.

«Платформаны «Қазақстан темір жолы» компаниясы салады. Бiздiң негiзгi мiндетiмiз стансаның өзі мен станса аймағын РДП құрамына енгiзу болды. Қазір екі апта бұрын жарияланған Көлік негіздеріне сәйкес техникалық-экономикалық негіздеме әзірленуде»,- деді Алматы қаласы әкімінің орынбасары Асқар Әмрин.

Құрылыс 2027 жылға дейін аяқталады деп жоспарлануда.