Алматыдағы  жылу жүйесіндегі ақау  ретке келтірілді

Алдыңғы түнде жылу жүйесінің  жарылуы салдарынан үш көше ыстық су мен жылусыз қалған болатын.

Бүгін Алматыдағы Ұлықбек пен Сайын  көшелері қиылысындағы жылу жүйелеріндегі ақау ретке келтіріліп, тұрғын үйлерге жылу берілгені туралы Алматы жылу желілері хабарлады.

«Ұлықбек қиылысы, Сайын көшесінің оңтүстік-батыс жағындағы жылу жүйелерінің жарылу салдары жойылды. 19 наурыздағы апаттан кейін диаметрі 700 мм құбыр бөлігін қалпына келтіру жұмыстары аяқталды. Сынақтан кейін жылу магистралі қайта іске қосылды және белгіленген режимде жұмыс істейді. Ұлықбек – Сайын – Жандосов – Ясауи көшелеріндегі үйлерге  ыстық су және жылу беру қайта жанданды» деп хабарлады «Алматы жылу желілері» ЖШС.

Төтенше жағдай орын алған жағдайда (су мен будың  шығуы) мамандар өз бетінше әрекет жасамауды және оқиға туралы «AlTS» ЖШС апаттық-диспетчерлік қызметіне тәулік бойы телефон нөмірі бойынша хабарлауды сұрайды: +7 727 3780665 немесе +7 727 341 08:00-ден 18:00-ге дейін қоңырауларды қабылдайды,  0777 жедел  нөмірі де бар.