Алматыдағы «Тәуелсіздік» монументіне гүл шоқтары үнсіз қойылды

Қазақстан Тәуелсіздігінің 30 жылдығына орайластырылған салтанатты шара дәстүрлі түрде Республика алаңында өтті.

Қала әкімі Бақытжан Сағынтаев бастаған билік өкілдері «Тәуелсіздік» монументіне гүл шоқтарын қойды. Салтанатты шараға сонымен қатар қала әкімінің орынбасарлары, аудан әкімдері, қоғамдық ұйым өкілдері, қала тұрғындары қатысты.

Бақытжан Сағынтаев үнсіз гүл дестесін қойды да,  сөз сөйлеген жоқ. Сондай-ақ, 1986 және 2011 жылдардағы  оқиғаларға ешкім тоқталған жоқ.

Әкім сөздің орнына шараға жиналғандармен амандасып, әңгімелесті, олармен суретке түсті.

Билік өкілдерінен бөлек желтоқсандықтар, партиялар мен азаматтық қоғам өкілдері, ауған жауынгерлері мен чернобыльдықтар, Қазақстан халқы Ассамблеясының мүшелері, этномәдени бірлестіктер мен «Нұр Отан» партиясы жастар қанатының өкілдері гүл шоқтарын қойды.

Дәл қазір Алматыдағы Республика алаңы маңында мобильді интернет өшірілген.

Полицейлер Желтоқсан көшесі – Абай даңғылынан Тимирязев көшесіне дейінгі жолды жауып тастады. Сәтбаев көшесінде Наурызбай батыр көшесінен басталып көлік қозғалысы жабылды.

Билік дәстүрлі түрде «Қазақстанның демократиялық таңдауы» акциясы жоспарланған уақытта интернетті бұғаттады (қозғалысқа Қазақстанда сот тыйым салған, бірақ Еуропарламенттің қарарларында ол «бейбіт оппозициялық қозғалыс» деп көрсетілген).

Дегенмен Жанболат Мамай бастаған тіркелмеген Қазақстан демократиялық партиясының өкілдері митинг өткізуді жоспарлап отыр.

Қазір 1986 жылғы оқиғаға қатысушылар мен олардың жанұялары гүл шоқтарын қоюда.