Алматыдағы тәртіпсіздіктерден кейін ұсталған үш баланың әкесі босатылды

Алматыдағы тәртіпсіздіктерден кейін ұсталған Тимур Ким тергеу изоляторынан шықты.

2022 жылдың 9 қаңтарынан бері оның әйелі Ләйлім Әбілдаева отағасын босатуды сұрап жүр. Оның айтуынша, бұрын айып тағылған бап қайта қаралып жатыр. Қазір Тимур Ким отбасымен үйде.

– Іс Бас прокуратурада қаралды. Тергеушілер барлық көршілерінен, таныстарынан сұхбат алды, барлық бейнежазбаларды көрді. Ол сағат нешеде кетіп қалды, қайда болды, не істеді бәрін білді. Айғақтардың барлығы оның тәртіпсіздіктерге қатысы жоқ екенін көрсетті. Қазір оған «Жаппай тәртіпсіздіктерге қатысу» бойынша айып тағылып отыр, - деді әйелі.

Әбілдаева 9 қаңтар күні сағат 19.00 шамасында бетперде киіп, автомат ұстаған 10 шақты адам олардың үйіне басып кіріп, үш баланың көзінше отағасын ұра бастағанын айтқан еді. Содан кейін оны белгісіз бағытқа алып кеткен. Әйелі күйеуін бірнеше аптадан кейін ғана тапты.

Құқық қорғау органдарының мәліметінше, кейін ер адам ҚР Қылмыстық кодексінің 255-бабының 4-бөлігі бойынша лаңкестік жасады деген күдікпен ұсталған.