Алматыдағы тұрақтардың бірінде белгісіз біреулер ер адамды соққыға жыққан

Алматы тұрғыны көлік тұрағында шыққан жанжал нәтижесінде белгісіз біреулер оның бауырын соққыға жыққанын мәлімдеп, куәгерлерге іздеу салды.

Оқиға 5 желтоқсан күні сағат 21:00 шамасында Алатау ауданында орын алып, бейнебақылау камераларына түсіп қалған. Видеоны зардап шегушінің туыстары әлеуметтік желіге жариялады. Олар соққының «Алматы Арена» спорт кешеніне қарама-қарсы орналасқан «Алмалы» тұрғын үй кешенінің ауласында болғанын мәлімдеді.

«43 жастағы ер адам 27 жастағы інімді соққыға жыққан. Алдымен олар тұрақта ұрысып қалған, кейін ер адам інімді балалар алаңына апарып, есін жоғалтқанша ұрған. Ер адам жалғыз болмаған. Қазір інімнің жағдайы ауыр. Дәрігерлер бас сүйегінің сынғанын және бас миының контузиясын растады. Біз куәгерлерді іздеп жатырмыз» деп жазды зардап шегушінің туысы.

Қалалық полиция басқармасы бұл фактіні растап, оқиғаның «Ақбұлақ» шағын ауданында болғанын алға тартты.

«Бұл дерек Қылмыстық кодекстің 106-бабы «Денсаулыққа қасақана ауыр зиян келтіру» бойынша сотқа дейінгі тергеп-тексерудің бірыңғай реестріне тіркелді» дейді тәртіп сақшылары.

Айта кетсек, жоғарыда аталған бап бойынша кінәлілер 12 жылға дейін бас бостандығынан айырылуы мүмкін.