Алматыдағы лаңкестік әрекеттерден келтірілген шығын алдын ала есептелді

Алматыдағы лаңкестік әрекеттер кезінде келтірілген шығын 112,6 млрд теңгені құрайды. Бұл туралы Алматы қаласы әкімінің орынбасары Ілияс Өсеров тіршілігін қалпына келтіру жөніндегі қалалық штаб отырысында мәлім етті.

Оның айтуынша, келтірілген шығынды анықтау жұмыстары әлі жалғасуда.

Келтірілген залалдың ішінде:

• 67 млрд теңге кәсіпкерлік субъектілеріне,
• 22,6 млрд теңге әкімшілік ғимараттарға,
• 16,7 млрд теңге материалдық-техникалық базаға,
• 1,9 млрд теңге көліктерге тиесілі.

Кәсіпкерлік субъектілеріне келетін болсақ, шағын және орта бизнес субъектілеріне 42 млрд теңге, ірі субъектілерге – 25 млрд теңге зиян келген.

Зиянның басым бөлігі азық-түлік емес дүкендерде тіркелген – 20,9 млрд теңге:

• азық-түлік дүкендеріне – 5,7 млрд теңге,
• қару-жарақ дүкендеріне – 6,4 млрд теңге,
• ломбардтарға – 2,9 млрд теңге,
• қоғамдық тамақтандыру нысандарына – 1,8 млрд теңге,
• қаржы ұйымдарына – 702 млн теңге залал келтірілген.

Ірі кәсіпкерлік субъектілеріне келтірілген залал бүгінде 24,9 млрд теңгені құрап отыр.

Мамандардың айтуынша, әкімдік ғимаратына 20 млрд теңге, прокуратураға 2 млрд теңге, полиция ғимараттарына 205 млн теңге, экопосттарға 163 млн теңге және медициналық мекемелерге 2 млн теңге шығын келтірілген.

«Алдын ала материалдық-техникалық базаға келтірілген залал 16,7 млрд теңгені құрады. Полиция бөлімшесінің техникалық құралдары мен қару-жарақтары (16 млрд) бүлінген. «Сергек» жүйесіне келтірілген шығын алдын ала 250 млн теңгені құрап отыр» деді Ілияс Өсеров.

Оның айтуынша, аудандар тұрғысында кәсіпкерлік субъектілеріне ең көп зиян Алмалы ауданында (20,5 млрд теңге) тіркелген. Одан кейін Әуезов (20,1 млрд) және Бостандық (17,3 млрд) аудандары келеді. Ең азы Наурызбай ауданында.