Алматыдағы діни нысандар қалай жұмыс істейді?

Алматы қаласы Дін істері басқармасы басшысының орынбасары Ерғали Көшеке мен қаланың бас имамы Еркінбек Шоқай «қызыл» аймаққа өтуді ескере отырып, Алматыдағы діни нысандардың қалай жұмыс істейтінін айтты, деп хабарлады ORDA.

— Эпидемиологиялық жағдайдың нашарлауын ескере отырып, шектеу шаралары діни орындарға да әсер етеді. Атап айтқанда, діни ғимараттарда тек, әлеуметтік арақашықтықты және басқа санитарлық нормаларды қатаң сақтаған жағдайда «жеке намаз оқуға» рұқсат етіледі, деді Ерғали Көшеке.

Діни бірлестік әкімшіліктеріне санитарлық нормаларды сақтау бойынша тиісті шаралар қабылдау тапсырылды:

• келушілердің температурасын өлшеу;
• бетпердесіз адамдарды кіргізбеу;
• көрнекі жерлерге зарарсыздандыру құралдарын орнату;
• діни бірлестіктердің аумағында кемінде екі метр аралықпен арнайы жазба белгілерін қою;
• айналаның тазалығын қамтамасыз ету.

 — Мен қаламыздың діни бірлестіктері жетекшілері мен келушілерден уақыттың шектеулігіне түсіністікпен қарауды сұраймын, деді Дін істері басқармасы басшысының орынбасары.