Алматыдағы атыс: оқиға орны әлі де полиция қоршауында

20 қыркүйек Алматы қаласы Алатау ауданында болған атыстан кейін Сыздықов көшесі полиция қоршауына алынған болатын. Қоршау әлі де сол қалпында тұр.

Бұл туралы оқиға орнында жүрген Orda.kz журналисі хабарлайды.

Сот орындаушысы мен екі учаскелік полицейді қосқанда бес адамның өмірін қиған Игорь Дужновтың көршісі оның адамдармен көп араласпағанын айтады.

– Көрші тұрамыз. Жамандығын көрмедік. Көп араласпайтын адамдармен. Бірақ олардың ауласынан ұрыс-керісті естімедік. Оның момындығы осыған жеткізген шығар деп ойлаймыз. Кеше шамамен 5-6 оқ атылды. Атыс кезінде осы жерде болдық, балаларым мен немерелерім қорқып есікті жауып алдық. Біздің көше өте жақсы араласатын ек, бірақ ол көп қосылмайтын. Әкесі мен өгей анасы болған, олар қайтыс болып кетті-ау деймін, - дейді есімін атамауды сұраған Игорь Дужновтың көршісі.