Алматыда ұшақ экипажының 4 мүшесі астан уланған

Алматыда ұшақ экипажының 4 мүшесі астан уланған. Ресми мәліметтерге сүйенсек, «Алматы-Астана», «Астана-Алматы» және «Алматы-Семей» рейстерінде қызмет атқарған борт серіктері өздерін жайсыз сезініп, үшеуі ауруханаға түскен.

Біреуі үйінде емделуді жөн санапты. Қазір олардың жағдайы жақсы. Осы жайтқа қатысты тамақпен қамтамасыз ететін мекеменің цехында тексеріс жүргізілген.

Санитарлық нормалардың бұзылғаны анықталып, оларға 1600 АЕК көлемінде айыппұл салынды.

Дегенмен, санитарлық-эпидемиологиялық департамент өкілдері экипаж мүшелерінің нақты борттағы тамақтан уланғанына күмән келтіріп отыр.

«Барлық қажетті талдаулар жүргізілді. Талдау нәтижесі теріс көрсеткіш берді. Олар қолданған тамақ өнімдерінің барлығынан ешқандай оң нәтиже шыққан жоқ. Осыған байланысты борттағы тамақтан улануды күдігі расталмады», - деді ДСМ Көліктегі санитарлық-эпидемиологиялық бақылау департаменті басшысы міндетін атқарушы Ақмарал Рамазанқызы.