Алматыда троллейбус аялдамаға соғылды — зардап шеккендер бар

8 тамыз күні кешке Алматы қаласының Бостандық ауданында №11 бағыттағы троллейбус қатысқан жол-көлік оқиғасы болды, деп хабарлайды Orda.kz.

Оқиға шамамен сағат 22:00-де Тимирязев пен Байтұрсынов көшелерінің қиылысында болды. Қоғамдық көлік жолдан шығып кетіп, аялдамаға соғылған.

Полицияның мәліметінше, жүргізуші көлікті басқара алмай қалған. Қақтығыс сәтінде аялдамада адамдар болған. Салдарынан бір жаяу жүргінші мен троллейбустың бір жолаушысы зардап шекті. Екеуі де ауруханаға жеткізілді, ауыр жарақат тіркелмеген.

Алдын ала болжам бойынша, жарылған дөңгелек  апатқа себеп болуы мүмкін. Аталған жол апатына байланысты тергеу басталды.