Алматыда Тасмағамбетов сатқан жер телімі заңсыз болып шықты

Иманғали Тасмағамбетов қол қойған жер телімі туралы келісім 20 жылдан кейін жарамсыз деп танылды, деп хабарлайды Orda.kz.

2006 жылы Алматы қаласының Түрксіб ауданынан көпқабатты тұрғын үй салу үшін жер телімі сатылған еді.

Алматы қаласының Жер ресурстарын басқару департаменті әкімдіктің 2005 жылғы қаулысы мен кейінгі келісімдердің заңдылығына күмән келтіріп, сотқа жүгінген. Талап-арыз Алматы әкімдігіне, «Казахтрансстрой» ЖШС-не және жер телімінің қазіргі иесі Денис Колесниковке қарсы берілді. Даулы жердің көлемі – 0,0851 гектар, мекенжайы – Чернышевский көшесі, 2. Ол бастапқыда тұрғын үй салуға және пайдалануға берілген.

Сот отырысы барысында 2006 жылы бұл телімде жатақхана болғаны, ал кейбір бөлмелері жекешелендірілгені анықталды. Соған қарамастан, жер ғимаратсыз сатылған – бұл заңға қайшы. Сонымен қатар, сот талап қою мерзімі өтіп кетпеген деген шешімге келді. 2024 жылы Түрксіб ауданының прокуратурасы бұл келісім мен оған негіз болған әкімдік қаулысын жарамсыз деп тануды талап еткен.

Нәтижесінде сот Иманғали Тасмағамбетов пен «Казахтрансстрой» ЖШС арасында жасалған келісімді жарамсыз деп таныды.