Алматыда тағы бір заңсыз ғимарат сүріліп жатыр

Алматыда сот шешімімен заңсыз салынған тағы бір ғимарат сүрілді.

Бөгенбай батыр көшесі, 24-үйдегі төрт қабатты ғимарат рұқсатсыз тұрғызылған. Бұл туралы Алматы қаласының қала құрылысын бақылау департаменті хабарлады.

Сот талқылауы мен апелляциялық шағымдардан кейін Жоғарғы сот бұл іске нүкте қойды. 2022 жылдың 30 қарашасында бірінші инстанция мен Алматы қалалық сотының шешімі өзгеріссіз қалдырылды. 5 мамырда сот орындаушыларының қатысуымен ғимаратты бұзу жұмыстары басталды.

Тағы бір мекенжайда басқарма қызметкерлері пәтерлерді сату туралы хабарландыруларды анықтады. Достық даңғылы, 170/1 мекенжайындағы жер теліміндегі құрылыс сонау 2005 жылы басталып, кейін тұрып қалған. Меншік иесі ауысқаннан кейін сол жерге сауда нысандары заңсыз салынған. 2023 жылдың 2 мамырында оларды бұзу туралы шешім қабылданды. Енді сот шешімі заңды күшіне енеді деп күтілуде.

Қала құрылысын бақылау департаменті азаматтарды қырағы болуға шақырады. Пәтер сатып алмас бұрын +7 (727) 229-81-36 сенім телефоны арқылы салынып жатқан тұрғын үй кешендерінің құжаттарын тексеру қажет.