Алматыда «Қытай экспансиясына қарсылық» митингісі өтті

Бүгін, 27 наурыз күні Қазақстанда екі оппозициялық топ халықты «Қытай экспансиясына қарсылық» митингісіне алаңға шығуға шақырған болатын. Orda.kz. тілшілері оқиға ортасынан хабарлайды.

Жанболат Мамай мен Мұхтар Әблязов екеуінің де шақырған уақыты мен митингінің белгіленген орны бір. Бұған дейін осы митинг қарсаңында елде полиция қызметкерлері кейбір белсенділерді бөлімшеге шақыра бастағаны белгілі болған.

Алматының «қызыл» аймақта екеніне қарамастан бүгін белсенділер алаңға шықты. Белсенділер жиналған Уәлиханов алаңында полиция қызметкерлері де келді. Алматыда митинг өтеді деген Шоқан Уәлиханов алаңын полиция жиын басталмай тұрып жан-жақтан қоршап, адамдарды өткізбеді. Алаңға жақын көшелер де жабылды. Аумақта интернет өшірілді.

Санитарлық дәрігерлер жүргіншілердің дене қызуын тексеруде. Жақын арада екі автозак пен жедел-жәрдем көлігі тұр.

Жанболат Мамай сағат 11.30 –да жақтастарының алтауын ұстап әкеткенін хабарлады. Белсенділердің басты талаптары – жерді ешкімге бермеу және қытай экспансиясына қарсылық.

Тіркелмеген «Қазақстан демократиялық партиясы» өкілдері митинг өткізетінін әкімдікке ескерткенмен партия жақтастарының өздері алаңға әрең өткен. Бастамашыл топ өкілдерінен Инга Иманбай мен Абзал Достияров бар.