Алматыда әскери қызметкер парашютпен секіру кезінде көз жұмды

Қазақстандық әскери қызметші парашютпен секіру кезінде қайтыс болды. Қайғылы оқиға 14 қыркүйекте Алматы облысында орын алды.

Бұл туралы Orda.kz ҚР Қорғаныс министрлігінің баспасөз қызметіне сілтеме жасап хабарлады.

– 2021 жылы 14 қыркүйекте Алматы облысында парашютпен секірудің жоспарлы жаттығуларын орындау кезінде Қарулы Күштердің әскери қызметшісі, 1990 жылы туған капитан көз жұмды. Жақындарының өтініші бойынша басқа мәліметтер жарияланбады, - делінген хабарламада.

Марқұм бұған дейін парашютпен 50-ге жуық рет секірген, жедел десантшылар тобының мүшесі болған. Қайғылы оқиғаның себептері мен мән-жайы анықталуда.

– Қорғаныс министрлігі басшылығы мен Қарулы Күштердің жеке құрамы қайтыс болғандардың туыстары мен жақындарына қайғыларына ортақтасып көңіл айтады. Қорғаныс министрлігі әскери қызметшінің отбасына көмек көрсету үшін қажетті шараларды қабылдайды, - деді министрлікте.