Алматыда шерулер мен ереуілдердің жаңа бағыты пайда болады

Алматы қаласы мәслихаты 2020 жылдың 23 маусымындағы «Мамандандырылған орындарды анықтау, сондай-ақ Алматы қаласында бейбіт жиындар ұйымдастыру мен өткізу үшін мамандандырылған орындарды пайдалану тәртібі туралы» шешіміне өзгеріс енгізетін шешім жобасын дайындады.

Бұл туралы Orda.kz хабарлады.

Атап айтқанда тізім мынадай тармақпен толықтырылды:

«Қонаев көшесінің бойындағы Тоқаш Бокин атындағы ескерткіштен Шевченко көшесінің қиылысына дейін, одан кейін Шевченко көшесінің бойымен Шоқан Уәлиханов алаңына дейін».

Белгіленгендей, бұл жерде:

• жасанды жарықтандыру;
• электр қуатын қосатын нүкте;
• бейнебақылау камералары;
• 50 көлікке арналған орындар бар.

Бұл мамандандырылған орын бейбіт жиналыстар, шерулер мен демонстрациялар бағытын ұйымдастыру мен өткізуге арналған.

Еске салсақ, бұған дейін митингтер мен демонстрациялар өткізу үшін мына орындар белгіленген: Махатма Ганди атындағы саябақ, Сары Арқа кинотеатрының артындағы алаң, Шоқан Уәлиханов алаңы, шерулердің орны Шоқан Уәлиханов алаңынан Махатма Ганди саябағына дейін Шевченко көшесімен анықталды.