Алматыда салық төлемеген жол талғамайтын көлік иелерін іздеу басталды

Алматыда көлік салығын төлеуден қашып жүргендер іздестіріліп жатыр. Олардың жартысынан астамы қымбат  көлік иелері. Полицейлер  борышкерлерді «Сергек» камерасы арқылы тауып, жол бойында тоқтатып, тексерді.

Өткен жылдың сәуір айынан бері Алматыдағы  көлік салығы бойынша  қарыз бес миллиард теңгеге жетті. Әңгіме 60 мың көлік туралы болып отыр. Мегаполисте барлығы 600 мыңға жуық көлік бар. Соған көңіл аударсақ, әрбір оныншы жүргізуші салық төлеуден қашып жүрген болып шығады.

— Борышкерлердің жартысы қозғалтқыш көлемі төрт мың текше метрден асатын көліктердің иелері. Бұл элиталық және қымбат жол талғамайтын көліктер. Қазір полиция қызметкерлері мен салық органдары және сот орындаушылары  осы жұмыспен айналысып жатыр. Бірақ кейіннен қарызы аз  қарапайым борышкерлерді де тексере бастайды. «Салық берешегі жоқ қала» акциясы шілде айының соңына дейін жалғасады, - дейді Алматы қаласы бойынша өндірістік емес төлемдер бөлімінің басшысы Қуаныш Түменбаев.

Желтоқсан көшесінде полицейлер қозғалтқыш көлемі 5,7 литрлік Toyota Tundra көлігінің жүргізушісін ұстады. Ер адам бірнеше жылдан бері салық қарызын өтемеген. Ол қашып кетпек болған, бірақ оны екі патруль көлігі жол жиегіне тоқтатты. Борышкер мемлекеттік қызметкерлерді жұмыстан шығарамын деп  қорқытпақ болған, бірақ артынша татуласып, бәрін төлеуге уәде берді. Белгілі болғандай, оның әртүрлі маркалы  жеті көлігі бар. Бірақ ол тек Toyota Tundra көлігі үшін салық төлемеген.

—Бұл көліктің иесі бюджетке 1 344 000 теңге қарыз. Яғни, үш жылдан бері салық төлемеген. Сәйкесінше, енді көлік  уақытша айыптұрағына қойылады. Жүргізуші куәлігінен айрылуы мүмкін, – деп түсіндірді жеке сот орындаушылардың өңірлік палатасы басшысының орынбасары Аида Рахымбаева.

Борышкерлердің көліктері айыптұраққа жөнелтілді. Салықты төлегеннен кейін көлік иесіне қайтарылады, болмаса  аукционда сатылады. Бір күнде полицейлер  салық органдарынан жасырынып жүрген 10 көлік иесін  ұстады. Олардың жалпы қарызы 11 миллион теңгеден жоғары.