Алматыда Республика алаңына барар жол қайта жабылды

Алматыда 4 қаңтар түс ауа орталық алаңдардың бірі – Республика алаңы, сондай-ақ оған баратын жолдар қайта жабылды. Онда түске қарай оппозиция митингісі жарияланған.

Полицейлер Назарбаев даңғылының Абай даңғылымен қиылысынан бастап көлік қозғалысын жауып тастады. Желтоқсан мен Сәтбаев көшелерінің бойындағы өткел де жабылды. Алаңның өзінде жаяу жүргіншілерге жол берілмейді.

Алаңда мобильді интернет жұмыс істемейді.

Түске қарай Қазақстан соты экстремистік деп таныған ҚДТ қозғалысының жетекшісі Мұхтар Әбіләзов өз жақтастарын алаңға шақырды. Маңғыстаудағы шерушілермен ынтымақтасу шараларын басқа оппозициялық күштер де жоспарлаған.

Еске салсақ, кеше де Алматыдағы орталық алаңдардың екеуі де – Республика алаңы да, «Астана» алаңы да жабылды. Қалада мобильді интернет кешке дейін жұмыс істемеді.