Алматыда ресейлік жұлдыздардың концерті тоқтатылды

Алматыда ресейлік жұлдыздардың қатысуымен концерт өтті. Қалалық мейрамханалардың бірінде атақты әншілер Ислам Итляшев пен Сұлтан Лагучевтің әндерін тыңдау үшін 500-ге жуық адам жиналды.

Бұл туралы Orda.kz Almaty.tv телеарнасына сілтеме жасап хабарлайды.

Бас санитарлық дәрігердің қаулысына сәйкес, іс-шараны өткізу кезіндегі толымдылық 50 адамнан аспауы керек. Мекеме қонақтары маска режимі мен әлеуметтік қашықтықты сақтамаған. Құқық бұзушыларға хаттама жазылып, іс құзыретті органдарға жіберілді. Ұйымдастырушылар тоқтатылған концерт үшін тыңдармандардың ақшасын қайтаруға уәде берді.

– «Хан Сарай» банкет залы тарапынан заң бұзушылықтар анықталды. Ол жерде 500-ден астам адам болды. Шара тоқтатылды. Мекеме әкімшілігінен түсініктемелер алынды, – деді Алмалы аудандық кәсіпкерлік және өнеркәсіп бөлімінің бас маманы Ерден Бисембаев.

Айта кетейік, оңтүстік астанадағы эпидемиялық жағдай тұрақсыз күйінде қалып отыр. Коронавирустық инфекция жұқтырғандар күн сайын тіркелуде. Осыған байланысты мамандар қала тұрғындары мен кәсіпкерлік нысандарының иелерін санитарлық нормалар мен карантин талаптарын қатаң сақтауға шақырды.

Еске салайық, Сұлтан Лагучевтің «Горький вкус» әні Ресейде ғана емес, ТМД-ның басқа елдерінде де танымал болды. Бүгінгі таңда YouTube-те бейнебаяны 113 миллион рет қаралған.