Алматыда қаржы пирамидасын ұйымдастырушыларға сот үкімі шықты

Алматыда қаржы пирамидасын ұйымдастырған топқа сот үкімі шықты. Олар 6 миллиард шығын келтірген.

Алматы қаласы Бостандық ауданының № 2 аудандық сотында 16 сотталушыға қатысты аса ірі көлемде қаражат тарта отырып, қаржылық пирамиданы басқару және алынған ақшаны заңдастыру  фактісі бойынша қылмыстық іс қаралды (217-баптың 3-бөлігі «Қаржылық (инвестициялық) пирамиданы құру және басқару»; 218-бабының 1-бөлігі «Қылмыстық жолмен алынған кірістерді жылыстату»).

Сот айыпталушылар 2017 жылдың мамыры мен 2020 жылдың желтоқсаны аралығында қаржы пирамидасы құрылымдық бөлімшелерін ұйымдастырып, басқарғанын анықтады.

«Әзірленген жоспарға сәйкес, А. және басқалары «Q» ЖШС-н ашып, ақша салуды ұсынып, салымшыларға жоғары пайыздық мөлшерлемелерге уәде бере отырып, адамдар тартқан.

Сотталушылар республика аумағында тыйым салынған қаржылық пирамида ашты. Аталған ұйымның Шымкент, Түркістан, Астана, Қарағанды, Тараз, Ақтау, Атырау, Орал, Ақтөбе, Қостанай, Павлодар, Өскемен қалаларында құрылымдық филиалдары болды. Кеңселерде олар жаңа инвесторлар тартумен де айналысқан» деп хабарлады сот.

Ұйымдастырушылар жарнамалық науқан жүргізіп, кірісі жоғары инвесторларды тартып, салымшылар санын ұдайы арттырып отырғаны айтылды. Экономикалық қызметке лицензиясыз салымшылар тартумен, валюта нарығында ойдан шығарылған инвестициялық операцияларды ұсынумен айналысқан.

«Бұл әрекеттер 1345 жәбірленушіге аса ірі көлемде 6 миллиард 136 миллион 223 мың 773 теңге залал келтірді» деп нақтылады сот.

Қылмыстық істі қарау кезінде сот шын өкіну түріндегі жауаптылықты жеңілдететін мән-жайларды, бес сотталушының асырауында кәмелетке толмаған балалардың болуын, сондай-ақ қылмыстық жауаптылыққа алғаш рет тартылуды анықтады.

Сот үкімі бойынша 16 адам аса ірі көлемде  қаржы пирамидасының құрылымдық бөлімшелерін басқару және қылмыстық жолмен табылған ақшаны заңдастыруда делдалдық жасағаны үшін кінәлі деп танылды. 15 айыпталушы 6 жылға және 2 адам  6 жыл 8 айға дейінгі мерзімге  соттталды.

Тағы бір айыпталушы 1 жыл 6 айға бас бостандығынан айырылды. Үкім заңды күшіне енген жоқ.