Алматыда қарақалпақстандық азаматтық белсенді ұсталды

Алматыда қарақалпақстандық азаматтық белсенді Раиса Худайбергенова ұсталды. Бұл туралы Қазақстандағы қарақалпақ диаспорасы хабарлайды.

2022 жылдың 16 қыркүйегінде сағат 18:30-да тағы  қарақалпақстандық азаматтық белсенді Худайбергенова Раиса Атабайқызы Алматы қаласының маңында ұсталды. Ұстау КазЦик ауылындағы  Бұқар жырау көшесі 1в пәтерде орналасқан Нұрадин Досжанов атындағы медициналық орталықта жүргізілді. Мұнда Худайбергенова жоғары санатты кардиолог дәрігер болып жұмыс істейді.

— Ұстауды науқастарды қабылдау кезінде азаматтық киімдегі үш адам жүргізді. Біреуі өзін Қазақстан Республикасы Ішкі істер министрлігінен  — лейтенант Расулов ​​Айдос Сыдықұлы деп таныстырды. Қалған екеуі өздерін таныстырмай, Өзбекстаннан келген қызметкерлер екенін айтты, — дейді Қазақстандағы қарақалпақ диаспорасы.

Еске салсақ бұл  соңғы екі күнде  Алматыда қарақалпақ диаспорасы өкілдерінің үшінші рет ұсталуы. Бұған дейін де Қарақалпақстанның тумасы Қошқарбай Төремұратов пен Жангелді Жақсымбетов ұсталған болатын. Өзбекстан билігі оларға екі бап бойынша айып тағып отыр: 159-бап «Өзбекстан Республикасының конституциялық құрылысына қол сұғу» және 244/1-бап «Қоғамдық қауіпсіздік пен қоғамдық тәртіпке қатер төндіретін материалдарды дайындау, тарату және көрсету». Ташкент оларды Өзбекстанға экстрадициялауды талап етуде.

—Үстіміздегі жылдың шілде айында Қарақалпақстандағы билік тарапынан аяусыз басылған наразылық акцияларынан кейін Өзбекстанның құқық қорғау органдары өкілдері Алматыға келіп, қарақалпақ диаспорасының белсенді азаматтарынан жауап алған болатын. Әртүрлі деректер бойынша Қарақалпақстаннан шыққан азаматтардың  10-15-нен  жауап алынды. Қазіргі уақытта олардың үшеуі ұсталды, мүмкін, қамауға алу жалғасады, - дейді қарақалпақ диаспорасы.