Алматыда полицейлер алып кеткен ер адам мәйітханадан табылған

Алматыда 9 қаңтар полицейлер үйінен алып кеткен Жасұлан Анафияевті жақындары мәйітханадан тапқан.

31 арнаның хабарлауынша, марқұмның жақындары оны тоғыз күн бойы түрмелерден іздеген. Сенім телефоны арқылы оның мәйітханада екенін білген.

Марқұмның артында әйелі мен алты баласы қалған. Олар жалдамалы пәтерде тұрып, енді ары қарай күндерін қалай көретіндерін білмей отыр.

«Осындай азамат бар ма десем, ол өліп қалды дейді. Мен оны бер жақта естіп тұрмын. Оны сау күйінде алып кетті ғой, аяқ-қолы балғадай» дейді марқұмның әйелі Гүлзия Омарбаева.

48 жастағы Жасұланның денесі мәйітханада жатқан.

«Жасұланның 5 қаңтар күні шеруге шыққаны рас. Арандатушылардың кесірінен әскерилер жаралана бастағанда, оларды  қорғап, ауруханаға жеткізуге жүгіріп, көмектескенін өзі де айтқан еді» дейді оның жесір қалған әйелі.

Марқұм әйеліне көтеріліс кезінде сарбаздарға көмектескенін айтқан.

5 қаңтарда түсірілген видеодан марқұм Жасұланның полицейлердің жерге тастап кеткен қаруларын алмауға шақырғанын естуге болады.

9 қаңтар Жасұлан Анафияев досының үйіне шығып кеткен. Сол Ақбұлақтағы үйден оны арнайы жасақ алып кеткен. Содан кейін оны жақындары таппаған.

Әйелі күйеуінің түрін мәйітханада бастапқыда танымай қалған.

«Хайуанды да олай ұрмайды. Бас сүйегі, мұрны кіріп кеткен. Сүйегі қозғалып кеткен. Қан ұйып қалған. Қабырғалары сынған. Аяғының саусағына дейін бір сау жері жоқ» дейді Гүлзия Омарбаева.

Құжат бойынша марқұмның өлімінің себебі панкреатит. Ал полиция департаментінде жедел жәрдем өлім себебін жүрек жетіспеушілігі деп қойғандықтан, сараптама тағайындалғанын түсіндірді. Сараптама қорытындысы әлі шықпаған.

Енді Гүлзия алты баласымен жалдамалы пәтерде отыр. Пәтер құнын қалай төлейтінін білмей басы қатқан. Себебі, оның науқас қызы бар. Ал кенже балалары небәрі он айлық сәби.