Алматыда науқас адам хирургтың киімі мен ақшасын ұрлап кеткен

Алматыдағы ауруханалардың бірінде науқас дәрігердің күртешесі мен аяқ киімін ұрлап кетті, деп хабарлайды Polisia.kz.

Алматыда 30 жастағы ер адам медициналық көмек алған күннің ертесі  ауруханадан қашып кеткен. Науқас өзінің  жылы киімі мен аяқ киім болмағандықтан, құры кетпей, қызметкерлер бөлмесіне кіріп, дұрыс келген киімді  іле кеткен.

 «Ол өзіне шақ келетін киімді: қалтасында ақшасы бар күрте мен аяқ киім ала кеткен. Бұл осы мекемедегі  хирургтың заттары болып шықты. Күдікті бейнебақылау камераларының, сондай-ақ саусақ ізі арқылы және жеке басты анықтауға мүмкіндік беретін арнайы базаның көмегімен анықталды. Қылмыскерді  ізін суытпай ұстадық. Дегенмен ол ақшаны жұмсап үлгерген» дейді Медеу аудандық ІІБ полиция бөлімінің бастығы Еділхан Байғараев.

Дәрігердің заттары қайтарылды.

Аталған факті бойынша ҚР Қылмыстық кодексінің 188-бабы «Бөтеннің мүлкін ұрлау» бойынша тергеу басталды. Ұсталған азамат қылмысын бірден мойындады.