Алматыда намаз оқыған радикалдардың видеосы тарады

Желіде Алматы орталығында қасіретті қаңтар кезінде далада жайнамаз жайып, намаз оқығандардың видеосы жарияланды.

31 арнаның мәліметінше, видео 5 қаңтар сағат 22:10-да мемлекеттік Орталық мұражайдың жанында түскен.

Видеодан екі адамның бетін жауып, жерге жайнамаздарын төсеп, намаз оқығанын көруге болады. Жерде таяқтары жатыр. Сәл әрірек бір адам отыр.

Еске салсақ, Орталық мұражай қасіретті қаңтардың қақ ортасында қалған. Онда полицейлер мен курсанттар жараланып, мұражай қабырғасынан пана тапқан. Ал мұражай директорының орынбасары Бибігүл Дәндіғараева агрессивті топты жәдігерлерді қиратпауға көндірген.