Алматыда мопед жүргізушісі жолаушылар автобусына оқ атты

Мопед жүргізушісінің кім екені  анықталып, полиция оны іздестіріп жатыр.

Алматыда мопед жүргізушісі № 219 жолаушылар автобусына пневматикалық тапаншадан оқ атты. Қуанышқа орай оқиға салдарынан ешкім зардап шеккен жоқ, деп хабарлайды Orda.kz. қалалық полиция департаментіне сілтеме жасап.

«Жолдағы жанжал салдарынан мопед жүргізушісі пневматикалық тапаншадан автобустың әйнегін атып, оқиға орнынан бой тасалаған. Мопед жүргізушісінің кім екені анықталды. Оны ұстау шаралары жүргізілуде», - деп түсіндірді тәртіп сақшылары.

Оқиға 5 мамыр күні таңғы 10-дар шамасында Алматының Түрксіб ауданында болған. Куәгерлердің айтуынша, атысқа жолдағы жанжал себеп болған, болжам бойынша автобус жүргізушісі мопедтегі адамның жолын кескен.

Естеріңізге салсақ, Алматыда 16 сәуірде мас күйінде 64 жастағы ер адам көпқабатты үйдің терезесінен аңшы мылтығынан бірнеше рет оқ атқан. Оқиға Әуезов ауданында болған. Ол кезде де ешкім зардап шекпегені хабарланды.