Алматыда метро салушылар ереуілге шықты

Алматы метрополитенінің құрылысшылары 12 шілдеде жалақының екі есе өсуін талап етіп, жұмысқа шығудан бас тартты.

Бұл туралы Orda.kz КТК телеарнасына сілтеме жасап хабарлады.

– Бізге жалақы мен жәрдемақыны екі есеге көбейту керек. Бәрін тартып алды. Тасымалдайтын көлік те жоқ. Біз билікке жүгіндік. Олар есептер ескі, оны қарап, жаңартуымыз керек дейді. Жұмыс ауыр. Біз зілдей ауыр заттармен жұмыс істейміз. Жабдықтың бәрі ескірген. Тунельге кірсе болды, түтін шығарады, - деді жұмысшылардың бірі Анатолий Дерябин.

Құрылысшылар бірнеше жылдан бері осындай жағдайда жұмыс істеп келеді. Олар бұған дейін ешқандай шағым түсірмеген, себебі жалақылары жетіп тұрды. Қазір тамақ пен киім қымбаттап, алатындары түк болмай қалған.

Құрылысшылар жер астында екі жер асты стансасын салып жатыр. Егер жұмыс беруші олардың шарттарымен келіспесе, олар жұмыстан шығамыз деп отыр.

«Алматыметроқұрылыс» бұл жағдайға түсініктеме берген жоқ. Сондықтан, жалақы көтеріле ме, көтерілсе, үстіне қанша қосылатыны белгісіз. Жобаның тапсырыс берушісі - «Метрополитен» мемлекеттік кәсіпорны.

Тапсырыс беруші - «Метрополитен», бас мердігер - «Алматыметроқұрылыс». «Метрополитен» «Алматыметроқұрылыс» орындаған жұмыс үшін ақыны нақты аяқталған жұмыс актісі негізінде төлейді. Осы жылға 10,3 млрд теңге бөлінген. Біз мердігердің шаруашылық қызметіне араласпаймыз, - деп түсіндірді «Метрополитен» мемлекеттік кәсіпорны директорының күрделі құрылыс жөніндегі орынбасары Ғани Сағденов.