Алматыда мерзімді қызметтегі сарбаз әскери бөлімнің үшінші қабатынан секіріп кетті

Алматы қаласында №5571 әскери бөлімде  мерзімді қызмет атқарып жүрген сарбаз ауыр жарақат алды. Ол ғимараттың үшінші қабатынан секіріп кеткен, деп хабарлайды Orda.kz.

Оқиға 4 қазанда болғанын Қазақстан Ұлттық ұланының «Оңтүстік» өңірлік қолбасшылығының баспасөз қызметі растады. Зардап шеккен сарбаз жедел жәрдем ауруханасына жеткізіліп, қазіргі уақытта медициналық көмек көрсетілуде.

Ұлттық ұланның мәліметінше, сарбаз әскерге шақырылғанға дейін жақын туысынан айырылып, психологиялық күйзеліске түскен. Оған «бейімделу бұзылысы» диагнозы қойылған және ол әскери-дәрігерлік комиссияның шешімін күтіп жүрген.

«Бейнебақылау камераларының жазбалары оқиғаға бөгде адамдардың қатысы жоқ екенін көрсетті. Қазір қызметтік тергеу жүргізіліп жатыр, оқиғаның мән-жайы анықталуда»,  деп хабарлады Ұлттық ұланның баспасөз қызметі. 

Бұған дейін Ұлттық ұлан сарбаздары Абайдың 50 өлеңін жатқа айтып,  жұртты сүйсіндірген болатын. Өткен айда Алматы облысы Жамбыл ауданында әскердегі 19 жастағы егіздің сыңары  жас сарбаз өзіне-өзі қол салды.