Алматыда мемлекеттік қызметтшілер спорттан миллиондарды жымқырды

Алматыда мемлекеттік қызметшілер спорттағы миллионды жымқырғаны үшін жазаланды, деп хабарлайды Orda.kz.

Алматы қаласының Медеу аудандық соты спорт саласындағы миллиондаған ұрлыққа қатысты 3 фигурантқа үкім шығарды. Бұл туралы сыбайлас жемқорлыққа қарсы іс-қимыл агенттігінің ресми өкілі Данияр Бекайдаров ведомствода өткен брифингте хабарлады.

Сот алдында спорт басқармасының экономика және қаржы бөлімінің басшысы мен қалалық Олимпиадалық резерв даярлау орталығының 2 есепшісі отырды. Олар бюджеттен 171 миллион теңгеден астам қаржыны «жоқ тұлғаларға» жалақы мен басқа да төлемдер ретінде аудару арқылы ұрлаған. Сотталушылар 7 жылға бас бостандығынан айырылды.

«Сонымен қатар, экономика және қаржы бөлімінің басшысы мемлекеттік және қаржылық ұйымдарда басшылық қызмет атқару құқығынан шектелді, ал есепшілер 5 жыл бойы бухгалтерлік қызметпен айналысу құқығынан айырылды», – деп қосты Бекайдаров.