Алматыда мас жүргізуші полиция қызметкерін қағып кетті

Алматыда мас жүргізуші түнде полиция қызметкерін қағып кетті.

Бұл туралы Orda.kz хабарлайды.

«Буран-227» патрульдік экипажы Қабанбай батыр көшесінде тәртіп бұзып келе жатқан Hyundai көлігін байқайды. Жүргізуші полицейлердің талабына бағынбай, із суытуға тырысқан. Патрульдік отряд радиостанция арқылы Hyundai көлігінің координаттарын дереу жеткізген.

– Талғар бағыты бойынша экологиялық поста қызмет еткен полиция аға лейтенанты Мейіржан Бисембаев құқық бұзушыны тоқтатуға тырысқан, ал мас жүргізуші жылдамдықты арттырып инспекторды қағып кетеді. Инспектордың екі аяғы бірдей сынып, ішкі мүшелері ауыр жарақаттанады. Полиция қызметкері ауруханаға жатқызылды, - деді Алматы қалалық полиция басқармасының жергілікті полиция бөлімінің бастығы полковник Манап Саттаров.

Жүргізуші ұсталды. Полиция қызметкерлері анықтағандай, 59 жастағы жергілікті тұрғын көлікті мас күйінде басқарған.