Алматыда мас адам студент қызды пышақтап кетті

Алматыда 58 жастағы мас ер адам жанынан өтіп бара жатқан 24 жастағы қызға шабуыл жасады.

Жәбірленуші пышақ жарақатымен ауруханаға жеткізілді, деп хабарлады Orda.kz.

Оқиға 24 наурыз күні әл-Фараби көшесінде орын алған. Бойжеткеннің арқасы мен өкпесіне зақым келген.

– Ота жасалды. Мен қазір өзімді әлдеқайда жақсы сезінемін. Дәрігерлерге алғысым шексіз, - деді бойжеткен.

Зардап шегуші шабуылдаушыны білмейді.

Ал полиция күдіктіні ұстадық деп мәлімдеді. Анықталғандай ер адам 58 жастағы мегаполистің тұрғыны болып шықты. Ол Бостандық ауданының полиция бөлімінде ұсталды.

– Аталған факт ҚР Қылмыстық кодексінің 293-бабы бойынша сотқа дейінгі тергеудің бірыңғай тізіліміне тіркелді, деді полиция департаменті.

Тергеу амалдары жалғасуда.