Алматыда лаңкестік топқа қосылуға бел буған қазақстандық ұсталды

Алматы әуежайында радикалдардың ықпалына түсіп, террорист болуға бел буған Қазақстан азаматы ұсталды, деп хабарлайды Orda.kz.

«2023 жылғы 22 желтоқсанда Алматы әуежайында Ұлттық қауіпсіздік комитеті елден ұшып шығып, шетелдік лаңкестік орталықтарға бармақ болған Қазақстан азаматын ұстады. Ол бұрын ұрлық, зорлау және кісі өлтіру бойынша сотты болған» деп хабарлады Ұлттық қауіпсіздік комитеті.

Хабарланғандай, түрмеден шыққаннан кейін ер адам радикалды идеологияның ықпалына түсіп, лаңкестік топтардың қатарына қосылу үшін Сириядағы соғыс аймағына баруды шешкен.

Ол сондай-ақ лаңкестік әрекеттерді қаржыландырды деген күдікке ілінді. Қылмыстық кодекстің 258-бабы бойынша сотқа дейінгі тергеу амалдары жүргізілуде.